Artikel

Pasar Klithikan Pakuncen Dadi Alternatif Wisata

          Pasar rongsokan utawa pasar klithikan temtu ana ing saben kutha. Pasar Klithikan Pakuncen sejatine madeg durung suwe. Pasar iki diresmekake tanggal 13 November 2007 dening Mentri Negara Koperasi dan UKM wektu iku suryadarma Ali.

            Sadurunge Pasar Klithikan Pakuncen iki minangka pasar kewan paling gedhe ing kukuban Daerah Istimewa yogyakarta. Ing sela – selane wektu minangka pengacara, Heniy nduweni kesenengan ngumpulake barang antik. Merga kepengin nambah koleksine dheweke asring dolan menyang Pasar Klithikan Pakuncen. Ing pasar klithikan dheweke asring nemokake barang – barang antik kang angel golekane.            Pancen ing pasar klithikan Pakuncen ora mung ana barang antik utawa loak kang kuna. Ing pasar iki uga ana barang – barang anyar. Barang – barang gaweyan anyar weton pabrik uga didhasarake ana ing pasar iki. Wiwit saka maneka busana kang asring ngrenggani Supermarket, sepatu lan tas modhel saiki. Tekan maneka peralatan komunikasi kaya ta telepon – telepon genggam lan blackberry modhel anyar uga bisa ditemokake ing pasar iki.            Miturut Purwanto, koleksine para pedagang handphone uga ora kalah karo konter – konter handphone kang ana ing pusat perbelanjaan. Kalebu siyap menehi garansi ing babagan dol tinuku. Aja wedi menawa barang sing ana kene iku barang peteng utawa cedhak gegayutane karo durjana.            Saliyane minangka papan dol tinuku, Pasar Klithikan Pakuncen uga bisa dadi obyek wisata alternatif. Bisa minangka papan tujuwan wisata. Merga ing Mancanegara akeh kang gawe pasar klithikan utawa pasar loak minangka papan wisata alternatif. “Agen wisata uga wis nglebokake Pasar Klithikan minangka papan tujuwan wisata,” mengkono pratelane Herry Zudianto.            Apa pepennginane Pasar Klithikan Pakuncen minangka papan wisata alternatif bisa kasembadan. Temtu gumantung kepriye pihak pengelola pasar, para pedagang anggone nata dagangan. Apik apa ora. Menawa apik, temtu pangarep – arep para wisatawan mancanegara kang teka ing Yogyakarta saliyane kepengin weruh Keraton Yogyakarta, utawa menyang Candi Prambanan uga menyang Pasar Klithikan Pakuncen.

Sumber : Panjebar Semangat